Biarritzeko aireportua egun osoan zehar itxita lainoagatik
Biarritz Parma aireportua igande arratsaldetik itxita dago behe-laino lodiak ezinezkoa egiten duelako hegazkinak lurreratu edo aireratzea. Kostaldeko aireportuan lurreratu ezin izan zuten hegaldiak Paueko aireportura desbideratuak izan ziren, Air Franceko zenbait hegaldi ere handik abiatu ziren. Gaur egoera bera errepikatuko dela aurreikusten da.
BIARRITZ
Igande arratsaldean jadanik bidaiariak zain zeuden Biarritzeko aireportuan. Batzuek gaua hoteletan pasatu zuten eta beste batzuek trena hartzea edo auto bat alokatzea erabaki zuten. Atzo aldiz, egoera zailagoa zen, alokatzeko autorik ez baitzen gelditzen eta hoteletan ere ez zen toki askorik. Gaurko, egoera okertzea espero da.Bi irudi oso ezberdin ikus zitezkeen atzo Biarritzeko aireportuan. Eguraldiaren menpe etsita zeuden bidaiariak eta, asaskatuago, autobusetara igotzen ari zirenak. Atzo irteteko itxaropena izan zutenen artean, Air Franceko zenbait bidaiarik zortea izan zuten, beraien hegaldiak hurbil dagoen Paueko aireportutik atera baitziren. Konpainia frantsesak Pariserako bidaietarako autobusak ezarri zituen, bidaiariak Paueko aireporturaino garraiatzeko. Prezio baxuetako hegaldiak eskaintzen dituen Ryan Air konpainiak aldiz, ez zuen Pauetik zerbitzurik eskaini, autobusak alokatzeko gastuak ordaintzea ez baitzuen onartu. Beraz, konpainia horrek Biarritzetik Ingalaterrara eta Irlandara eskaintzen dituen bidaia guztiak ezeztatu egin ziren. Atzo goizean arratsaldeko bietatik aurrera hegazkinak berriro abiatuko zirela adierazi zuen aireportuko zuzendaritzak. Eguraldiaren aurreikuspenek eguerdirako lainoa altxatuko zela eta arratsaldean berriz jaitsiko zela esaten baitzuten. Baina behe-lainoak ez zuen Lapurdiko kostaldea egun guztian zehar utzi eta Biarritzeko aireportuko pistak itxita egon ziren. Behe-laino horrek tenperaturak hoztu zituen eta izotza ere ekarri zuen.
|
