RSF taldeak bere zerrenda beltzetik kanpo utziko du ETA
GASTEIZ Mugarik Gabeko Albistariak taldeak RSF frantsesez ez du ETA sartu 2005 urteari dagokion txostenean, non bere iritzian kazetarien edo hedabideen kontra aritu diren pertsona eta taldeak zerrendatzen dituen. Antolakunde horrek, gainera, bere «zerrenda beltzetik» aterako du euskal erakunde armatua, hark su-eten iraunkorra iragarri ostean.Horixe adierazi zuen atzo Rosa Massague RSF taldeko kideak, nahiz eta gaineratu zuen oraindik ez dutela halakorik egin, horrelako neurri bat hartzeak, haren aburuz, «denbora gehiago» behar duelako. Massaguek «herri honek egun bizi duen bake testuingurua» aipatu zuen erabakia argudiatzeko. Erabaki horrek, edonola ere, Prentsa Elkarteen Federazio espainolaren (FAPE) kexa eragin du dagoeneko, haren iritziz «akatsa» izan baita ETA iragan urteko txostenean ez sartzea eta zerrenda beltzetik ateratzea.
«Alde bakarreko erabakia»
Fernando Gonzalez Urbaneja FAPEko lehendakariak atzo adierazi zuen «Parisen hartutako alde bakarreko erabakia» izan dela, eta nabarmendu zuen ez duela «Espainiako elkartearen babesa». «Errakuntza bat izan da», aipatu zuen Urbanejak Almerian egindako agerraldi batean, eta gaineratu zuen «arazo larri bati buruz arinkeriaz hartutako iritzia» dela. Horrez gain, esan zuen, horrelako erabaki bat hartuta, RSF taldea «bere egitekotik harago» doala. RSF taldeak asteartean eman zuen iragan urteko txostenaren berri, eta horren aurkezpenean nabarmendu zuen 2004tik aurrera euskal erakundeak ez duela «prentsa askatasunaren kontrako ekintzarik egin». Duela sei urte hasi zen egoitza Parisen duen RSF taldea «prentsa askatasunaren harrapakarien» zerrenda egiten, eta urtebete geroago, 2001ean, sartu zuen bertan ETA lehen aldiz.
|
