- Harri-zulatzaileak (Euskal Herriko Bakarkako finala)
Hamar kirolari, eta txapel bat jokoan
DONOSTIA
Euskal Herriko beste final bat ere izango da gaur, 13.30etik aurrera jokatuko baitute Harri Zulatzaileen Bakarkako finala ere. Galdamesen izango da, Sanpedro plazan. Bertarako, honako kirolari hauek lortu dute sailkatzea: Berridi, Isuzkiza, Aurrekoetxea, S.Garcia, Andueza, Herbosdo, A.Garcia, De la Concepcion eta Gutierrez.
Finalerako txartela lortu duten hamar kirolarien artean, hiru nabarmendu beharko dira beste guztien gainetik, horiek izango baitira gaurkoan irabazteko faborito nagusiak. Alde batetik, Aritz Isuzkiza. Hondarribikoa da egungo txapelduna, eta kanporaketetan ere berak egindakoa da markarik onena. Beraz, bera izango da irabazteko faborito nagusia. Bestea, berridi. Hura ere Jaizubia taldekoa. Berea izan da kanporaketetako bigarren markarik onena. Hirugarren faboritoa Aurrekoetxea izango da, Txoriherri taldekoa. Berea da hirugarren markarik onena, baina kanporaketan zerbait gehiago egin ote zezakeelako susmoa ere badago. Berak jantzi zuen Binakako txapela De la Concepcionekin, eta gaurkoan ere gipuzkoarrei zaplazteko bat emateko prest dago. Beste zazpi kirolari ere badira, ordea, finalean, eta ezusteak beti egoten dira, harri gogorra egokitzea nahikoa baita galtzeko.
|
