DONOSTIA

Honako kirolari hauek arituko dira gaur arratsaldean nor baino nor: Ostolatza, Irigoien, Landarbide eta Urpe. Kirolari bakoitzak 125eko bola, 150eko kubikoa, 175eko edo 200eko zilindroa, eta 175eko edo 200eko errektangularra erabiliko ditu. Zilindroa 175ekoa baldin bada, errektangularrak 200ekoa izan beharko du, edo bestela alderantziz. Harri bakoitzarekin hiru minutuko txandak izango ditu kirolari bakoitzak.

Joseba Ostolatza: Zestoarra da txapelduna, eta bera da berriro ere garaipena eskuratzeko faborito nagusia. Harri Txikiekin ere bera da txapelduna, eta bere helburua urte hau bi txapelekin amaitzea izango da. Gauzak oso gaizki egiten ez baditu behintzat, nahiko zaila izango da norbaitek garaipena kentzea.

Aimar Irigoien: Errezildar gaztea da beste faboritoa, baina oso zaila izango du Ostolatzari aurrea hartzea. Berak ere hori badaki, eta bigarren postuan amaituko balu ere, garbi dauka postu oso ona izango dela. Aimarrek ere gauzak oso gaizki egiten ez baditu behintzat, zaila izango da bigarren postua baino atzerago geratzea.

Landarbide: Aiarra lan on bat egiteko asmoarekin plazaratuko da.Berak badaki aurreko biei aurrea hartzea oso zaila izango duela, eta lehenengo helburua hirugarren postu hori izango du. Horretarako Urpe izango du erreferentzia, eta bera gainditzeko asmoarekin plazaratuko da, ez baita postu txarra izango.

Urpe: Bizkaitarraren erreferentzia ere Landarbide izango da. Ez du erraza izango gipuzkoarra gainditzea, baina asmo horrekin joango da Altsasura, eta hirugarren postu horretarako lehia ederra eskaini dezakete bi harri-jasotzaileek.