- Lau eta Erdia
Barriolak larri irabazi zuen Olaizola I.aren aurka Azkoitian
OLAIZOLA I 17
BARRIOLA 22
DONOSTIA
Abel Barriola Lau eta Erdiko final-zortzirenetan izango da, ostiral gauean Gurea Azkoitiko pilotalekuan Asier Olaizolaren aurka larri irabazi eta gero. Leitzako atzelariak dena alde izan zuen, baina ez zuen asmatu eta azken unera arte itxaron behar izan zuen hurrengo kanporaketarako txartela eskuratzeko. Patxi Ruiz izango da bere hurrengo aurkaria. Final-hamaseirenetan Peñagarikanoren aurka erakustaldi latza eman zuen Barriolak. Ostiral gauekoa, ostera, oso bestelako neurketa izan zen. Aspeko atzelaria sakeak aprobetxatu eta bere aurkariaren ezkerra bilatzeko asmoz kantxaratu zen, eta laster alde garrantzitsua lortu zuen (14-6). Erraz gailendu behar zela zirudien, baina orduan Olaizola I.aren erreakzioa etorri zen. Sakea berreskuratu zuen eta luze jokatzen hasi zen, Barriola asko behartuz. Leitzakoari asko kostatu zitzaion pilotari abiadura ematea, eta konturatu orduko Goizuetakoa gainean zuen (16-16). Une horretan edozer gauza gerta zitekeela pentsatu zuten gehienek. Hamazazpina ere joan ziren, baina Olaizola I.ak ezin izan zuen tanto gehiago egin, eta, bere huts batzuk baliatuta, Barriola hogeita bira heldu zen.
|
