- Sokatira
Izaskunek irabazi du lehenengo txapela
DONOSTIA
Izaskunek eraman du aurtengo Euskal Herriko lehenengo txapela. Gipuzkoarrak Bigarren Mailan aritu dira aurten, lehen aldiz plazaratu baitira, eta 340 kilotan nagusitu dira. Jokatu diren hiru probak irabazi dituzte. Amaiur, Girizia, Lau Soka eta Algorta sailkatu dira atzetik.
Nesketan, 240 kiloko saioa jokatu zuten, eta Gaztedi A nagusitu zen. Talde horrek ere txapela oso gertu du. Gaztedi B eta Girizia sailkatu ziren gorrien atzetik.
Mutiletan, baina Lehen Mailan, 290 kiloko lehen faseko azkeneko jardunaldia jokatu dute, eta honako talde hauek sailkatu dira: Abadiño A, Abadiño B, Gatika, 6 Conceyos, Auzolan eta Sokarri.
Nafarroan amaitu da zortzinakako herrialdeko lehiaketa, eta Amaiurrek eta Sakanak eraman dituzte azkeneko bi txapelak.
Mutiletan, 580 kiloko finala jokatu zuten. Pisu horretan, Amaiur A taldea izan zen onena. Beti Gaztek irabazi ditu orain arteko txapel guztiak, baina pisu horretan jende gaztearekin aritu da, eta azkeneko postuan geratu da. Amaiur A taldeak finaleko saio guztiak irabazi zituen. Bigarren taldea geratu zen bigarren; Beti Gazte Lesakakoa, berriz, azkena izan zen.
Nesketan, Sakanak eraman du 480 kiloko txapela ere. Lehen jardunaldian hark irabazi zuen. Bigarrengoan ere ez da ezusterik izan, eta eurentzat izan da garaipena, saioko tiraldi guztiak irabazita. Sailkapen nagusian onenak izan dira 6 punturekin, eta bigarren berdinduta amaitu dute Beti Gazte A taldeak eta Beti Gazte B taldeak. Biek ere hiru puntu dituzte.
|
