EEPk eta hainbat eragilek hitzarmenak sinatu dituzte euskara sustatzeko
BAIONA Duela egun batzuk Ikas-ekin egin bezala, atzo, Euskal Konfederazioarekin eta hiru elkarterekin Euskal Zerria, Surfrider Foundation Europe eta Swing Home hitzarmenak sinatu zituen Euskararen Erakunde Publikoak (EEP).Max Brisson lehendakariak aditzera eman zuenez, gizartean euskara erabiltzea sustatzea da hitzarmenon xedea. Akordioak elkarteen eta erakundeen bo- rondatean eta engaiamenduan oinarritzen direla gehitu zuen, eta «elkarteok EEPren hizkuntz politikaren eginbidearen segida eraginkorra» direla nabarmendu.
Eguneroko erabilera
Hitzarmenen sinatzaileek konpromisoaren zergatiak azaldu zituzten. Hala, Surfrider fundaziokoko Gilles Asenjok esan zuen «dagoen eskakizunari erantzuteko» baliagarria izango dela. Jazz emanaldiak antolatzeaz arduratzen den Swing Homeko Sabri Bouchfarrek, berriz, «entzuleengan euskara ezagutu eta hedatzeko», eta Euskal Zerria elkarteko Mixel Ocafrainek «koherentziagatik eta Ipar eta Hego Euskal Herriko zerri haztegiekin egiten duten lanean erabiltzen» dutelako.Euskal Konfederazioko Mixel Etxeberrik eskerrik beroenak eman zizkien orain artean euskararen erabilera administrazioan bultzatzeko hitza eman duten berrogeita bi herriko etxeei, baita UEMA eta EKE erakundeei ere eskainitako laguntzagatik. EEPri zuzenduz, lehen baino bitarteko gehiago izanik eta erakunde ofiziala denez, «orain artean baino gutxiago ez egitea» eta «batzuengan euskara erabiltzeak sortzen dituen lotsak desagertzea» espero daitekeela adierazi zuen. EK-k elkarlanerako prest dagoela azaldu zion EEPri. Urtebeteko balioa izango duten hitzarmenei esker, EKri 15.000 euro eta elkarteei 4.500 eta 5.000 euro bitarteko diru-laguntzak emango dizkie EEPk.
|
