Auzi-helegitea Algortako Portu Zaharreko lanen aurka
GETXO
Getxo Bizia plataformak administrazioarekiko auzi-helegitea aurkeztu du Galdaretxeko lanen aurka; hau da, Ereaga eta Portu Zaharra lotzeko egiten ari diren proiektuaren aurka.Helegite hori duela hiru hilabete ezarritako Deuseztatze Eskariaren ondoren dator. «Eskari hura Udalari zuzendu zitzaion, eta horrek hiru hilabetez erantzun ez zuenez, isiltasun administratiboagatik ez onartutzat eman zuten. Hala, orain Bilboko Administrazioarekiko Epaitegiak erabaki beharko du auzi horren inguruan», esan du Getxo Bizia plataformak. Aurkeztutako helegitean, lan horietan lege-hutsuneak egon direla hartzen dute oinarritzat, eta horrengatik guztiarengatik, Getxo Biziak lan horiek egiteko erabakia deuseztatzeko eskatzen du epaitegietan. Halaber, auzia ebazten duten bitartean, badaezpadako neurri gisa lanak gelditzeko eskatzen dute helegitean, konponezineko kalteak eragotzi ahal izateko, Getxo Bizia plataformak azaldu duenez.
|
