Clearstream auziko lekuko nagusiak ez du hitz egin nahi
Clearstream auziko lekuko nagusia, Philippe Rondot inteligentzia zerbitzuetako buru ohia, auzia ikertzen ari diren epaileengana behartuta eraman zuen atzo Poliziak, baina informazio gehiago emateari uko egin zion. Aurretik sekretupean esandakoak prentsak argitaratu izana salatzeko ekintza izan da.
PARIS
Philippe Rondot, Estatu frantseseko inteligentzia zerbitzuetako buru ohia, “Clearstream auzia” ikertzen ari diren epaileengana eraman zuen atzo Poliziak behartuta, baina ez zuen adierazpenik egin. Rondot lekuko gisa deklaratzera deitu zuten joan den ostegunean eta orduan ere ez zuen txintik esan. Bere isiltasuna protesta ekintza izan da, aurretik epaileei sekretupean esandakoa prentsari eginiko filtrazioen bidez argitaratu baitute eta horrek Dominique de Villepin lehen ministroaren irudia kaltetu du. Clearstream auziak Gobernu frantsesean bazterrak nahastu ditu, Nicolas Sarkozy egungo Barne ministroaren izena zikintzeko ahaleginean Villepin lehen ministroa eta Jacques Chirac presidentea bera nahasten baititu. Prentsak zabaldutako informazioaren arabera ustez Rondoten adierazpenetan eta idatzietan oinarrituta, Sarkozy ustelkeria auzi batekin lotzen saiatu zen Villepin, nahiz eta bai lehen ministroak bai presidenteak behin eta berriro ukatu duten. Villepinek eta Sarkozyk datorren urteko Lehendakaritzarako hauteskundeetarako UMP alderdiko hautagai izateko lehia bizia dute. “Le Monde” egunkariak egunotan zabaldutako informazioaren arabera, Rondotek Villepin babestu nahi du eta horregatik ez du gehiago hitz egin nahi. Nolanahi ere, prentsaren lehen orrialdeak betetzen dituen Clearstream auziak ez du interes bera pizten frantsesengan. Duela gutxi egindako inkesta baten arabera, Estatu frantseseko biztanleen %59ri ez die auzi horrek axola. %31k, ostera, oso garrantzitsutzat jotzen dute. Edonola ere, Villepinen etengabeko gainbeheran biziki lagundu du.
|
