IGELDO

«Beste hutsunea irakasleena da, beti justu samar ibiltzen gara irakasle kopuruarekin, Hezkuntza Sailak finkatzen duen ratioa ez baita nahikoa guretzat», agertu du Ixabel Fernandez bertako zuzendariak. Zortzi irakasle aritzen dira Igeldon, batzuk lanaldi erdiz eta herenaz. Datorren urterako beste irakasle bat eskatu dute, baina, oraindik orain, ez dute Lakuaren erantzunik jaso.

Ixabel Fernandez zuzendariak hamabi urte daramatza bertan, eta gustura dago eskolaren martxarekin. «Lan handia egin behar izan dugun honaino iristeko», nabarmendu du. Izan ere, eskola txikiak «hezkuntzako anai-arreba txiroak» diren sentsazioa daukate maiz. Hala ere, eta sentsazioak sentsazio, beren hezkuntza proiektua «oso aberatsa» dela uste du Fernandezek. «Eguneroko lanean ikusten dugunez, handiek txikienei laguntzen diete, eta kasik anai-arrebak bezala dira. Harremana oso berezia da. Egia da irakasleentzat badaudela zailtasunak. Izan ere, adin bakoitzean desberdintasun nabarmenak daude, eta gerta daiteke gela bakarrean bi adineko ikasleak izan eta mailaren araberako lau talde izatea», gaineratu du.

Legeak curriculumak indibiduala izan behar duela zehazten du, eta baldintza hori eskola txikietan primeran betetzen dela iritzi dio Fernandezek. «Ikasle gutxi daudenez gela bakoitzean, ikasle bakoitzaren jarraipena oso ondo egin dezake irakasleak, primeran ezagutzen ditu bakoitzaren beharrak».

Behin hamabi urte betetzen dituztenean, Igeldoko ikasleak Antiguako Luberri Institutura joaten dira ikasketak jarraitzera, eta ondo moldatzen direla nabarmendu du eskola txikiko zuzendariak. «Ez dute arazorik izaten eta emaitza akademikoak ere besteen parekoak dira».

Eskola txikia familia handi bat da, ikasle eta guraso guztiek elkar ezagutzen dute. «Jolas garaian haurrei begira egotea benetan oso polita da», gaineratu du Fernandezek. Eskola orduetatik kanpo ere berdintsu jarraitzen dute, harreman estuak sortzen baitira.