YAKARTA
Milaka filipinarrek protesta egin zuten atzo Manilan Gloria Macapagal Arroyoren Gobernuaren kontra. Ezkerreko mugimenduen kontrako gerra zikina egitea egozten diote Gobernuari. Macapagal presidenteak 2001ean agintea hartu zuenetik ia 700 ezkerreko aktibista hil dira modu bortitzean.Biktima horietako batzuen erretratuak eskuan hartuta, 3.000 bat protestarik Presidentzia Jauregiaren egoitza inguratu zuten, Filipinetako hiriburuan. Bayan (Herrialdea) ezkerreko alderdiak legeztatuta daudenetatik ezkerreko alderdi nagusia da deitu zuen ekitaldira. Protesta baketsua izan zen hasieran, baina ez zeukan Gobernuaren baimenik, eta, ondorioz, Polizia gogotik aritu zen kolpeka eta ur kanoiekin manifestarien kontra. Macapagalen Gobernuak manifestatzeko eskubidea debekatu zuen iaz «segurtasun arrazoiak» argudiatuta.
Ezkerreko buruzagiek barruko eskualdeetan Armadaren etengabeko jazarpena jasaten dutela salatu zuten antolatzaileek. «Militar faxistak nekazaritza-guneetatik joan daitezela», oihukatu zuten manifestariek Poliziaren erasoetatik ihes egiten saiatzen ziren bitartean.
Ezkerreko mugimenduek joan den ostegunean jasan zuten azken erasoa. Markus Bangit alderdi politiko erregional bateko ordezkaria tiroz hil zuten Isabela eskualdeko San Isidro herrian. Tiroketan herriko eskolako zuzendaria ere hil zen.
Alderdi batek 104 kide galdu ditu
Karapatan (Eskubidea) giza eskubideen aldeko erakundeak 679 hildako zenbatu ditu Macapagalen bost urteko agintaldian. Biktima gehienak nekazarien eta gazteen taldeko buruzagiak eta militanteak dira. Alderdien artean Bayan Munak pairatzen du bereziki bortizkeria hori. Hiru parlamentari ditu Kongresuan, eta 2001etik 104 militante galdu ditu gerra zikinaren ondorioz. Justiziak ez du kasu bat ere argitu.
