DONOSTIA

Honako segalari hauek izango dira gaur, Orendainen: Gabirondo, Goikoetxea eta Zuriarrain. Hiruretan Joxe Gabirondoren itzulera nabarmen daiteke. Gazteluko segalari beteranoa goi mailan ibilitakoa da, baina azkeneko urteetan nazioarteko erako proba batzuetan ikusi izan bazaio ere, ez da lehiaketa ofizialetan aritu. Segaren ordez, trontza hartu zuen, eta kirol horretan ere goiko muturrera heldu da, bai Igor Esnaolarekin, baita Aitor Esnaolarekin ere, Gipuzkoako eta Euskal Herriko txapelak jantzi baititu. Gaur berriro ere segan ikusi ahalko zaio, eta finalerako sailkapena lortzeko faboritoetako bat izango da gazteluarra. Harekin batera, bere herritarra eta iloba da aurrera egiteko faboritoa, Goikoetxea. Azkeneko urte hauetan finaletan edo finaletatik oso gertu ibili ohi izan da, eta gauzak normal joanda, gaur ere aurrera egiteko txartela lortu beharko luke. Zuriarrain gaztea, berriz, ezustea ematera plazaratuko da. Galtzeko ez dauka ezer, multzorik zailena egokitu baitzaio. Beste finalerdia datorren asteburuan jokatuko dute Zizurkilen, eta han izango dira Aranalde, Dorronsoro eta Alkorta. Finalerdi horietan ordu erdiko lana izango dute; eta finalean, berriz, ordubeteko lana egin beharko da.

Aurten, Mitxelena, Erasun, Goenaga eta Ormaetxea, besteren artean, ez dira arituko, baina daudenek maila ona eman nahiko dute.