DONOSTIA

Maila nagusiko finala dotorea izan daiteke. Azkeneko urtebete honetan bai Olasagasti baita Nazabal ere goi mailako finaletan ibili dira, eta gaur ere horrela izango dira. Biek elkarren aurka joan den apirilaren 28an neurtu zituzten indarrak Lazkaon, final-laurdenetako ligaxkan, eta orduan Etxarrikoak irabazi zuen.

Olasagastik berak onartzen du nafarra dela faborito, baina bera ere ongi omen dago, eta gauzak zail jarri nahi dizkio. Ez du ahazten EuskalHerriko finala. Orduan ere Nazabal faborito garbia zen, baina igeldoarrak jantzi zuen txapela. Aurtengo Urrezko Aizkorak, gainera, ez du beste urteetakoekin zer ikusirik. Besteetan iraupeneko proba luzea bakarrik izaten baitzen. Aurten proba laburrak baina ugari dira, eta enborrekin ere kontuz ibili behar izaten da, proba batean adarren bat atereaz gero, segundo asko galtzeko arriskua baitago.

45 ontzakoa kolpeka moztuz hasiko dira aizkolariak lanean. Hori amaitutakoan, kana-erdiko bat zutik ebaki beharko dute. Ondoren, 45 ontzakoa erlojuz kontra moztu beharko dute. Ondorengo proban, bi 45 ontzako izango dituzte. Bat zutik eta bestea etzanda. Azken-aurreko proban, berriz, 60 ontzakoa etzanda moztu beharko dute, eta azkenik, lau kana-erdiko eta bi 60 ontzako izango dituzte zain.

23 urtez azpikoetan, berriz Rekondo eta Otaegi arituko dira aurrez aurre. Hemen ere nafarra aterako da faborito, Rekondo alegia, baina Otaegi ere gerra emateko asmotan plazaratuko da. Maila nagusian bezalaxe, final horretan ere hainbat proba egin beharko dituzte.

45 ontzakoa kolpeka moztuz ekingo diote lanari. Gero, 45 ontzakoa erlojuz kontra moztu behar izango dute. Hori amaitutakoan, 60 ontzakoarekin abiadura proba egin beharko dute, eta azkenik bi kana-erdiko eta bi 60 ontzako moztuko dituzte. Finala, Azpeitian ­Izarraitz pilotalekuan­ jokatuko dute gaur gauean, hamaiketan hasita.