Baionako portuaren kudeaketa Akitaniako Kontseilu Nagusiak hartu du bere gain
·Atzo izenpetu zuten hitzarmena Akitaniako ordezkariak eta Estatu frantsesekoak
BAIONA
2004ko legearen ondorioz, Estatu frantsesak kudeatzen zituen bigarren kategoriako portu guztiak dezentralizatuak izatea erabaki zen. Baionako portua bigarren kategoria horretan dagoela-eta, Akitania eskualdearen esku jarri dute. Segurtasuna, berriz, Estatu frantseseko zerbitzuen gain geratuko da. Francis Idrac Departamenduko prefetak eta Alain Rousset Akitania eskualdeko lehendakariak izenpetu zuten kudeaketarako hitzarmena.
Atzo bi agintariek aditzera eman zutenaren arabera, Estatu frantsesean dezentralizazio prozesua bururaino eramaten duen lehenengo portua da Baionakoa. Hala, urtero 4 milioi tona salgai jasotzen dituenez gero, kategoria horretako Estatu frantseseko bederatzigarren portua da. «2000. urtetik portuaren zirkulazioak gora egin du, eta gaur egun egonkortua dago. Portuek toki garrantzitsua dute garapen ekonomikoan, eta gure xedea Baionakoa garatzea da», argitu zuen AlainRoussetek. Horrenbestez, AHT proiektua aipatzen den une honetan, Akitaniaren nahia errepidetik eramaten diren salgaiak trenez eta itsasoz garraiatzeko baliabideak garatzea da.
«Garraioaren prezioak gora eginen du, eta hein horretan, Baionako portua Pasaiakoarekin batera leku garrantzitsua izanen dute», nabarmendu zuen azkenik.
|
