IRUÑEA
Udalak ez duela berekin bildu nahi salatu zuen Amma Asistencialeko enpresa batzordeak, Iruñeko Udaleko Etxez Etxeko Arreta Zerbitzuaren esleipena duenak. «Azken astean hiru aldiz deitu diegu eta ezetz erantzun digute», azaldu zuen enpresa batzordeko lehendakari Pili Errok.
Horiek hala, Iruñeko Udalak jarrera hori izaten jarraituz gero, mobilizazioak egingo dituztela jakinarazi zuen enpresa batzordeko lehendakariak. Seguruenik lan-utzialdiak izango dira.
Errok argitu zuen: «Dugun lan arazoa konpontzeko Udalarekin eta enpresarekin hitz egin behar dugu, baina Udalak esan du enpresarekin negoziatzen badugu, ez dela gurekin bilduko». «Ammarekin 2006ko lan-baldintzak ari gara negoziatzen, eta Udala 2007ko urtarriletik aurrerako zerbitzua esleitzeko baldintza-orria egiten ari da. Ezinbestekoa da Udalak batzordearekin 2007ko eta ondorengo urteetarako lan-baldintzen gaineko akordioak hartzea eta akordio horiek baldintza-orrian eta arlo ekonomikoan islatzea», esan zuen Peio Lasa ESK-koak.
Era berean, orain arte Ammarekin izandako harreman bakarra proposamenak trukatzeko izan dela azaldu zuten.
Batzordeak, besteren artean, honako eskatzen du 2007tik aurrerako: 7 orduko lanaldia astelehenetik ostiralera, etxez etxeko langileentzat urteko 16.800 euroko soldata gordina eta bulegokoentzat 26.600 eurokoa.
Beste alde batetik, Iruñeko Udaleko langileen batzordeak elkartasuna adierazi die Ammako langileei.
