Filmak, aktoreak, ikusleak... hitz batean, eromena
Berrehun filmetik gora erakutsiko dira hamar egunetan. Aktore eta zuzendari andana, 180.000 ikusle... hitz batean, sekulako eromena da Donostiako Zinemaldia, eta sekulako mauka zinemazalearentzat. Gaur altxatuko du oihala 54. edizioak. Donostiako kaleak kartelez josita daude, eta alfonbra gorria zabalik da Kursaal atarian.
DONOSTIA
Etorri beharreko gehienak badatoz edo etorri dira, baina hasi gara dagoeneko etorriko ez direnen izenak ere jakiten. Lars von Trier danimarkarrak “Boss of it All” filma aurkeztuko du Sail Ofizialean, baina ez da Donostian izango, hegazkinez bidaiatzeari fobia diolako. Bideokonferentzia bidez egingo du aurkezpena eta erantzungo die kazetarien galderei.Hutsune hori gorabehera, aurtengo Sail Ofizialak distirarik izan dezake. Iazkoan atal horrek jaso zituen kritikak ahaztu egiten direla diote. Filmak aurkeztuko dituzten izenak ez dira nolanahikoak. Carlos Sorin, Agnieszka Holland, Tom Dicillo, Martial Fougeron eta John Boorman ageri dira horien artean, eta “Tortokak ere hegan egiten dute” filmarekin Urrezko Maskorra irabazi zuen Bahman Ghobadi turkiarra ere badator. “Ghosts” film britainiarrak zabalduko du edizioa. Txinatik Britainia Handira legez kanpo iristen den etorkin baten ibilbidea kontatzen du. Benetako istorio batean oinarritzen da eta filma ere dokumentalaren eta fikzioaren arteko mugan egina dago. Filmaren egilea Nick Broomfield da, dokumentalaren generoa berritzen lan ikusgarriak egiten dituen zinemagilea. Mila eta ehun kazetari akreditatu izango ditu Zinemaldiak, horietatik 200 bat Estatu espainoletik kanpokoak. Film bakan batzuk izango dira kazetari saldo horien arreta erakarriko dutenak, Sail Ofizialekoak, bereziki, eta beste hainbat oharkabean pasatuko dira. Zinemazale zorrotzak berak asmatu beharko du bereak aurkitzen. Horretarako daude Zabaltegi, Horizontes Latinos, Ernst Lubitsch-en eta Barberts Schroeder-en atzera begirakoak, Belodromoko egitaraua, Euskal Zinearen Eguna eta beste hainbat ataletan arakatu beharko du horretarako. Haurrek, aurrekoetan bezalaxe, Belodromoan dute hitzordua, “Robots” filmaren euskarazko bertsioa ikusiko baitute goizetan. Hiru mila ikuslerentzako lekua apailatu dute beste behin Belodromoan, eta helduek ere baliatuko dute aretoa, “Llach: la revolta permanent” ikusteko, esate baterako, bihar bertan. Lluis Llach bera han izango da eta filmaren aurretik kanta batzuk interpretatuko ditu pianoarekin. Eta, horren ondotik beste bi film handi ere erakutsiko dira, “Click” izenekoa asteartean, AEBetan uda honetan arrakasta itzela izan duen lana, eta bi egun geroago Oliver Stonek berak “World Trade Center”. Euskal zinemak ere badu lekua Zinemaldian, eta aurten inoiz baino gehiago. Aipatuena berriro aipatzeko, ”Kutsidazu bidea, Ixabel” 28an estreinatuko dute Zabaltegin. Zinema da Zinemaldiko protagonista, baina zinema programazioarekin batean beste hainbat ikuskizun, erakusketa, bilera eta ekitaldi izango ditu aurtengo edizioak ere.
|
