Bielsako inauteriekin batera girotu ziren Altsasuko kaleak
Mende laurden igaro da Altsasuko inauteriak berreskuratu zituztenetik, eta, aurtengo jaiak berezi egiteko xedez, Aragoiko Bielsa herriarekin senidetza jaialdia ospatu zuten. Bi herri horietako inauteriek antzekotasunak gordetzen dituzte, eta, beraz, atzo biek batera ospatu zituzten Altsasuko jaiak. Horrez gain, akelarrea egin zuten lehen aldiz.
ALTSASU
Bielsako inauteriak Altsasukoekin batera ospatu zituzten atzo Nafarroako sakaneko herrian. Altsasuarrek orain hogeita bost urte berreskuratu zuten inauteriak ospatzeko ohitura eta, jaiari indar berezia emateko ahalegina eginez, Bielsako herritarrak gonbidatu zituzten. Bertan ikusi ahal izan zenez, bi herrietako jaiek antzekotasunak dituzte, jantziei eta ospakizuneko pertsonaiei dagokienean. Gauzak horrela, senidetze gisara aurkeztu zuten atzoko ospakizuna, eta goiz-goizetik ikusi ahal izan ziren mozorroak Altsasuko kaleetan. Bazkalordua iristerako denak bildu eta herri bazkaria egin zuten 200 pertsona inguruk. Bazkalostearekin batera hasi zen giroa berotzen eta, arratsaldea iristerako, ospakizunean murgildurik zeuden Altsasura hurbildu zirenak.
Juan Tranposoren «berpiztea»
Herritarrek aipatu zutenaren arabera, aurten «desagertzear» zegoen Juan Tranposoren berreskuratzea gertatu da. Zehaztu zutenez, pertsonaia lastoz beteriko zakuz dago osatua, eta bere barnean doan pertsonarentzat ez da erraza izaten oreka gordetzea; etengabe lurrera jausi eta ingurukoen laguntzaz zutitu behar izaten du. Juan Tranposoz gain, Momotxorroek, Lamiek, Maskaritek, Matxingaiztoek, Sorginek eta beste hainbat pertsonaiak hartu zituzten Altsasuko kaleak, betiere Akerraren gidaritzapean. Urtero egiten duten ezkontza ekitaldiak ere jende ugari erakarri zuen, apaiz, senargai, andregai eta guzti izaten baititu. Hogeita bosgarren urteurreneko ekitaldiekin jarraitzeko, iluntze partean Akelarrea antolatu zuten ekitaldi berezi modura eta, horren ostean, konpartsa guztiak herriko enparantzara iritsi eta Momorrotxoek zortzikoa dantzatu zuten.
|
