BILBO

Atzo egin zuten agerraldiaren zergatia gizarte ereduaren gainean aurrera eramango duten kanpainaren berri emateko izan zen.

STEE-EILASeko ordezkari Belen Arrondok proiektu honekin oinarrizko eskubide sozialen inguruan neurri zehatzak eskatzen dituztela aipatu zuen. Horrela, sindikatuek etxebizitzaren arazoa, hezkuntza, pobreziaren aurkako neurriak, menpekotasun egoeran daudenen zaintza eta osasuna aipatu zituzten gizarte arazo larri gisa; proposatzen dituzten politiken aldaketak lau gai horietan oinarritzen dira bereziki.

Atzo ezagutzera eman zuten kanpaina beste bi ekintzen ondorengo urratsa izan da. «Lehendabizi, hirukoaren aurrean programaren gaineko azterketa eta kritika egin genuen», esan zuen STEE-EILASeko ordezkariak. Bigarrenez, EAEko eta Nafarroako aurrekontuen gaineko azterketa eta kritika egin zuten.

Ekimen horrekin, sindikatuek oinarrizko eskubide sozialen inguruan neurri zehatzak eskatu nahi dituztela adierazi zuten.

Hiru sindikatuetako ordezkariek kanpainak hiru ekimen garrantzitsu izango dituela gaineratu zuten. Lehenengo urratsa proiektua hegoaldeko parlamentuetan aurkeztea izan da. Horrez gain, jardunaldi batzuk eramango dituzte aurrera aipatutako bost gai nagusien inguruan hausnartzeko eta eztabaidatzeko. Topaketak apirilaren 6an eta 7an egingo dituzte Gasteizko Europa Jauregian, eta hiru sindikatuetako kideen artean 400 parte-hartzaile espero dira.

Era berean, hurrengo astean gizarte ereduari buruzko legegintzako herri ekimena parlamentuek onartu duten edo ez jakinaraziko dute. Lege proiektua onartzekotan, 30.000 sinadura beharko lirateke Bizkaian, Araban eta Gipuzkoan aurrera eramateko, eta 7000 Nafarroan .

Euskal Autonomia Erkidegoan lau hilabeteko epea dago sinadurak biltzeko. Nafarroan, aldiz, bost hilabeteko epemuga dago legegintzako herri ekimena aurrera ateratzeko beharrezkoak diren sinadurak erdiesteko.

ELAko ordezkari Jose Elorrietak parlamentuetan aurkeztu duten proposamenarekin gizartearen ongizatea bilatu nahi dutela adierazi du.