GASTEIZ
Igor Anguloren familiak Bilbon agerraldia egiten zuen bitartean, Lakuako Gobernuko Barne sailburu Javier Balzak Santurtziko hilerrian izandako ekitaldiaren «erabilpen politikoa» egitea leporatu zien ezker abertzaleko agintariei. Hori horrela, dolu adierazpenak erakunde terrorista bat goraipatzeko erabiltzea ezin dela onartu gaineratu zuen Balzak kazetarien aurrean egindako adierazpenetan.
«Penagarria da semea lurperatu behar duen familia bat mota honetako tirabira politikoen erdian egon behar izatea», erantzun zuen Balzak kazetariek Santurtzin egin behar ziren omenaldi-ekitaldiak debekatzeagatik Batasunak plazaratu zituen kritiken gainean galdetu ziotenean.
Javier Balzak zera gaineratu zuen Gasteizko Legebiltzarrean: «Guztiok muga batzuk ditugu, eta muga horietako bat Zigor Kodeak ezartzen duena da. Horregatik, ez dugu inolaz ere onartuko erakunde terrorista bat goraipatzerik».
«Familiak eta lagunek egiten dituzten dolu adierazpenen gainean ez dugu ezer esateko, baina ezin dugu onartu hori beste mota bateko helburuetarako erabiltzerik», berretsi zuen Balzak.
Egoera horren aurrean, Gasteizko Legebiltzarreko Ezker Abertzalea taldeak Balzari zuzendutako galdera aurkeztu du Erregistroan. Ber- tan, Igor Anguloren omenaldia debekatzeko zein arrazoi zituen eta jarduera hori gatazka gainditzeko bidean mesedegarria izan daitekeen ala ez itauntzen du Ezker Abertzaleak.
Bide batez, otsailaren 24an Urduńan egin behar zen “Orain herria, orain bakea” proposamenaren aurkezpena Ertzaintzak zergatik debekatu zuen ere galdetzen du Ezker Abertzaleak.
ANV alderdiak, bere aldetik, gogor kritikatu zuen Javier Balzaren jarrera, ez baititu kartzela bortizkeriaren biktimak errespetatzen, eta haren jarduerak «frankistek gorri separatistekin izandako basakeria» gogora ekartzen duelako.
