BILBO
Euskal lurralde osoan ofizialtasuna eta hizkuntza eskubide guztien aitortza lortzeko, Euskal Herriak erabakitzeko ahalmena izan behar duela adierazi zuen atzo EHEk. Bide horretan, herritarrei eta euskal eragile guztiei «herri ikuspegitik» lan egiteko eskatu zien.Horixe adierazi zuten Fontso Cantera eta Unai Larrategi EHEko kideek Bilbon emandako prentsaurrekoan. «Hizkuntzaren normalizazioak herritar guztien aldeko jarrera aktiboa behar du. Orain arte aurrerapausoak eman badira ere, sakoneko aldaketak bilatu beharra dago, eta, horretarako, borroka honetan bakoitzak bere esparrutik ekarpena egitea ezinbestekoa da», azaldu zuten.
Egungo marko juridiko-politikoak, eta, horietan oinarrituta indarrean dauden hizkuntza politikak «jada agortuta» daudela, eta, beraz, euskararen normalkuntzarako ez dutela balio nabarmendu zuten EHEko kideek. Horren aurrean, euskal herritarrak hizkuntza politika berria erabakitzeko tresna izatea «premiazkotzat» jo zuten, eta, hortaz, Euskal Herrirako atal guztietan, baita euskara esparruan ere, erabakitzeko ahalmena aldarrikatu zuten.
«Erronka ikaragarria da, eta beharrezkoa eskubideen de-fentsan lanean jarraitzea. Konpromiso hori guztiok hartu behar dugu: herritarrok, baita eragile sozial, politiko eta sindikalek ere, bakoitzak bere mailan eta degokion erantzukizunez. Herri bezala egin behar diogu aurre erronka honi», nabarmendu zuten.
Lan horri ekiteko «alderdikeriak» albo batera uzteko eskatu zuten, eta «norberaren zilbo-rrera begiratu beharrean», hizkuntza eskubideen alde herri ikuspegitik lan egitea ezinbestekoa dela ohartarazi zuten bi euskaltzaleek.
Indarrak biltze hori arintzeko datozen hilabeteetan hainbat ekimen egingo du EHEk. Horrela, hilaren 18rako «Osasun zerbitzu guztiak euskaraz!» lelopean mobilizazioetara deitu du Barańainen, Hernanin eta Durangon, euskarazko osasun zerbitzuak eskatzearren. Bakoitzean manifestazio bana egingo da, 18.00etan Barańainen, eta ordubete geroago beste bi herrietan.
Eskubideak bortxatuta
Horren haritik, hizkuntza eskubideak «larriki bortxatzen» direla gogorarazi zuten EHEko kideek, eta horiek aldarrikatzeagatik isunak jartzeaz gain, azkenaldian jendea atxilotzeko aginduak eman eta epaitegietan hizkuntza eskubideak aldarrikatzeagatik espetxe zigorra ere eskatzen dutela salatu zuten.
III. Hizkuntza Eskubideen Eguna,
Santurtzin
Aurtengo Hizkuntza Eskubideen Eguna Santurtzin ospatuko da, apirilaren 2an. «Hizkuntza eskubideen defentsa guztion esku dago!» lelopean, hizkuntza eskubideak eta ofizialtasuna aldarrikatzea xede duen egunarekin beste urrats bat eman nahi izan du aurten EHEk. «Herri handia eta nahiko erdalduna aukeratu dugu, euskaldun guztioi Euskal Herri osoan hizkuntza eskubide berberak dagozkigula aldarrikatu nahi dugulako», azaldu zuten. Osoko egitaraua izango da. Zehaztapenak aurrerago ezagutaraziko dituztela azaldu zuen EHEk. -
