Ardi hil bat hartzaren aldeko arduradunaren etxean
·Hartzaren kontrako manifestariak FIEPeko nagusiaren etxera joan ziren, eta ardi hil bat utzi zuten
OLOROE
Ostiralean Oloroen izan zen hartzaren kontrako manifestazioaren ondoren, hogeita hamar manifestari inguru FIEPeko (Eko-artzaintzako Esku-hartze Funtsak) Pirinioetako hartz taldeko arduradun Gerard Caussimont-en etxera joan ziren barnean ardi hil bat uzteko asmoarekin. Azken horren emazteak eta seme batek ardi hila eraikinaren barnean sartzea galarazi zieten, baina etxeko lorategian utzi zuten. Ondoren, heriotza mehatxuak egin zituzten eta hartz batek ardi bat hiltzen duen aldiro itzuliko direla esan zuten.
Pirinioetan Esloveniako hartzak sartzearen kontrako zenbait jenderen metodoak «faxistatzat» jo zituen Caussimont-ek. Gainera, gehitu zuen politika eta sindikatu arduradunak horrelako jokabideetatik publikoki aldenduko direla espero duela eta, aldi berean, haiek ekintza modu zehatzean gaitzestea espero duela baieztatu zuen. Caussimont-ek gogorarazi zuen urteak daramatzala boluntario gisa lanean hartzak artzainei egindako galerengatik horiek diru-ordainak jaso ditzaten. Azkenik adierazi zuen gizartean bizitzeko elkarren errespetua beharrezkoa dela eta erasoa egin zutenengatik lotsa sentitzen zuela.
|
