Urkullu: «EAk erabaki behar du koalizioa»
·Koalizioa baino «gurea estrategia-apustua da, erakunde-nazionalismoa irudikatzen baitu», esan du eledun jelkideak
BILBO
Aurreko hauteskundeetan bezala, 2007ko udal eta foru hauteskundeetan ere EArekin koalizioan aurkeztearen alde dago EAJ. Hori nabarmendu zuen Iñigo Urkullu EBBko bozeramaileak, eta, alde horretatik, horren gainean erabakia EAk hartu behar duela adierazi zuen, atzo, Radio Euskadik egin zion elkarrizketan.
Adierazpenetan, bi alderdien arteko harremana koaliziotik harago doala ziurtatu zuen Urkulluk. «Harremana baino ge- hiago, gurea estrategia-apustua da, erakunde-nazionalismoa irudikatzen baitu; erakundeekin konpromisoa, hain zuzen», azaldu zuen.
EAJren planteamendu hori Begoña Erraztiren alderdiak ezagutzen duela ziurtatu zuen Urkulluk, eta erabakia EAren esku dagoela errepikatu zuen. «Egia da, aurreko esperientzietan oinarrituta, bi alderdien artean erabakitzeko, euskal gizartean ilusiorik eragingo ez duen zerbait ez helarazteko», adierazi zuen EBBko bozeramaileak.
Gainera, PSEren eta Batasunaren «ustezko elkarlanaren beldur» ez dela ziurtatu zuen.
|
