Errepresaliatuen aldeko ahots ugari Arrasaten
ARRASATE
Arrasateko Portaloira Topagunearen ekimenez, herriak euskal preso eta iheslari politikoekiko Elkartasun Eguna hartu zuen larunbatean. Haurrentzako puzgarri eta lantegiak, 250 lagunen arteko herri bazkaria eta herriko 20 tabernatan musika emanaldiak izan ziren goizetik arratsalde-partera aukeran.
Iluntzean, aldiz, «Eskubide guztien jabe, euskal presoak Euskal Herrira» leloak 1.200 lagun batu zituen manifestaziora, eta ekitaldi xumea egin zuten gero Monterron parkean. Bertan, euskal preso eta iheslari politikoen egoera «oso larria» dela salatu, eta eskubideak urratzen dizkietela deitoratu zuten. Besteren artean, Ibaetako Foroak aldarrikatzen dituen eskubideak bermatzeko eskatu zuen. Arrasaten, Ibaetako manifestua 30 eragilek baino gehiagok eta herritar ezagun ugarik babestu dute.
Atzo, presoen alde, Santurtzin 90 lagun mobilizatu ziren, Iurretan 43, Berangon 33, Sopelan 27, Abadiñon 25, Astigarragan 22, Añorgan 22, Zaldibian 20, Ataunen 12 eta Euban 11.
|
