GARA
GOTEBORG
Orkatz Beitiak sekulako hasiera eman zion atzo euskal atleten lanari Goteborgen jokatzen ari diren Europako Atletismo Txapelketetan. Ondarroako atletak gaur arratsaldean jokatuko diren 100 metroko finalerdietan sartzea lortu zuen lehen bi kanporaketak bikain gaindituta. Nahiz eta egindako markekin oso pozik geratu ez 10.43 eta 10.53, bizkaitarra Europako hamasei gizonik azkarrenen artean sartu da.
Goizean jokatutako lehen kanporaketa aise gainditu zuen. Hirugarren lasterketa egokitu zitzaion eta, hain zuzen ere, hirugarren postuan amaitu zuen, 10.43ko denborarekin lehen laurak sailkatzen ziren zuzenean, Dwain Chambers famatuak irabazitako txandan.
Arratsaldeko bigarren kanporaketan ere hirugarren txandan aritu zen Beitia. Lau azkarrenak sailkatzen ziren finalerdietara. Orkatzek, ozta-ozta izan arren, laugarren amaitu zuen proba, eta txartela eskuratu zuen. Bi ehuneneko baino ez zizkion atera Nemeth hungariarrari 10.53 eta 10.55 eta garaipena Francis Obikwelu faborito handiarentzat izan zen.
Orkatz Beitia oso pozik agertu zen sailkatzea lortu ostean, baina egindako denborek ez zuten batere konbentzitu. «Finalerdietara sailkatzea lorpen handia da niretzat, eta oso pozik nago. Egia esateko, markak begiratuta pixka bat harritu naiz. Orain lau urte 10.34 egin nuen eta, nire ustez, orduan baino sasoi hobean nago, baina hori pistan erakutsi beharra dago. Berri onena gaur beste aukera bat dudala da eta denborak hobetzen saiatuko naiz», adierazi zuen Bidezabalekoak.
Orkatz Beitiak bigarren finalerdian hartuko du parte Wijmeersch, Ostwald, Lewis-Francis, Osovnikar, Obikwelu Europako errekorraren jabea 9.86rekin, Kankarafou eta Jedrusinskirekin batera.
Errusiarrak 10.000koan
Lehen jardunaldiak bi final utzi zituen. Interesgarriena emakumezkoen 10.000 metroko lasterketa izan zen eta urrezko domina Inga Abitovak eskuratu zuen 30.31.42ko denborarekin. Lasterketa osoan Lornah Kiplagat Holandako elastikodun kenyarra ibili zen lasterketaren buruan, baina azken 400 metroetan behera etorri eta bosgarren amaitu zuen. Zilarra Susanne Wigene norvegiarrarentzat izan zen eta brontzezko domina beste errusiar batek jantzi zuen, Lidiya Grigoryevak.
Gizonezkoen pisu jaurtiketan, urrezko domina azken unean irabazi zuen Ralf Bartels alemaniarrak 21.13ko marka eginda. Bigarren saiotik (21.11) Andrei Mikhnevich bielorrusiarra zegoen lidergoan, baina azken jaurtiketaren ostean zilarrarekin konformatu behar izan zuen. Brontzea Olsen danimarkarrarentzat izan zen.
